కేంద్ర మంత్రి అరుణ్ జైట్లీకి క్రికెటర్ల నుంచి అనూహ్య మద్దతు లభిస్తోంది. గతంలో డీడీసీఏ(ఢిల్లీ డిస్ట్రిక్ క్రికెట్ అసోసియేషన్) కు అరుణ్ జైట్లీ అధ్యక్షుడిగా ఉన్న కాలంలో అవతవకలు జరిగాయనే ఆరోపణలను మాజీ క్రికెటర్ల్లు వీరేంద్ర సెహ్వాగ్, గౌతం గంభీర్, ఇషాంత్ శర్మలు ఖండించారు.డీడీసీఏకు అధ్యక్షుడిగా ఉన్న కాలంలో ఆటగాళ్లకు ఆయన అండగా నిలిచేవారే తప్ప ఎటువంటి అవతవకలకు పాల్పడలేదని వారు అంటున్నారు. కొన్ని సందర్భాల్లో ఢిల్లీ క్రికెట్ లో ఆటగాళ్ల ఎంపికకు సంబంధించి ఏమైనా చెప్పాల్సి ఉంటే ఆయన వద్దకు నేరుగా వెళ్లి తెలియజేసే వాళ్లమన్నారు. కొంతమంది కావాలనే అనవసర రాద్దాంత చేస్తున్నారన్నారు. అంతేకాదు అరుణ్ జైట్లీ హయాంలోనే ఢిల్లీ స్టేడియానికి ట్యాక్స్ మినహాయింపు లభించడంతో పాటు ఒక గుర్తింపు లభించిందని తెలిపారు. ఢిల్లీ ఆటగాళ్లకు ఏ సాయం కావాల్సి వచ్చినా ఆయన అండగా నిలిచే వారన్నారు.
మరోవైపు అరుణ్ జైట్లీపై అవినీతి ఆరోపణలు ఎక్కు పెట్టింది కేజ్రీవాల్ సర్కార్. డీడీసీఏ అధ్యక్షుడిగా ఉన్న టైంలో జైట్లీ అవినీతికి పాల్పడ్డారని ఆరోపిస్తోంది. వెంటనే కేంద్ర మంత్రికి పదవికి జైట్లీ రాజీనామా చేయాలని డిమాండ్ చేస్తోంది. డీడీసీఏ ఫైళ్లను నాశనం చేయాలనే ఉద్దేశంతోనే తమపై కేంద్రం సీబీఐ దాడులకు ఉసిగొల్పిందని ఢిల్లీ సీఎం కేజ్రీవాల్ ఆరోపిస్తున్నారు.
