ఎవరన్నా జోక్‌ చెప్తే… విరగబడి నవ్వుతాం. ‘అబ్బా ఎంతకాలమైంది… ఇంత నవ్వు నవ్వి’ అంటాం. నిజానికి నవ్వుకున్న శక్తి అంతా ఇంతా కాదు. సైక్రియాటిస్టులు నవ్వించడాన్ని తమ వైద్యంలో భాగం చేశారంటే నవ్వుడం వల్ల ఎన్ని ఉపయోగాలున్నాయో అర్థమవుతుంది. బిగ్గరగా నవ్వితే ఏడేళ్లు ఎక్కువ జీవిస్తారట. రోజులో పదిహేను నిమిషాలపాటు నవ్వ గలిగితే శరీరంలోని నలభై క్యాలరీలు తగ్గుతాయి. మరో విషయం ఏమిటంటే మగవాళ్ల కంటే ఆడవాళ్లే ఎక్కువ నవ్వుతారని ఒక అధ్యయనంలో తేలింది. మగవాళ్లు రోజుకు సగటును ఎనిమిది సార్లు నవ్వితే స్త్రీలు అరవై రెండు సార్లు నవ్వుతారు.
నవ్వడం వల్ల శారీరక ఆరోగ్యం బాగుండటమే కాదు, మానసికంగా కూడా మంచిదట. జ్ఞాపకశక్తి కూడా నవ్వడం వల్ల పెరుగుతుంది. నిద్రపోయేటప్పుడు ఎంత హాయి కలుగుతుందో ఎక్కువగా నవ్వితే అంతే హాయి కలుగుతుందని పరిశోధనలో తేలింది. ఒత్తిడి, కోపం, ద్వేషం, భయం…. లాంటివన్నీనవ్వడం వల్ల పోతాయి. కావాలని నవ్వే నవ్వుకు, మనస్ఫూర్తిగా వచ్చే నవ్వుకు తేడాలుంటాయి. కావాలని నవ్వే నవ్వును ఎదుటి వాళ్లు ఇట్టే కనిపెట్టేస్తారు. మెదడుకు కూడా తెలిసిపోతుంది. నవ్వడం కోసం కామెడీ సినిమాలు, వీడియోలు చూడాలి. చిన్న పిల్లలు చేసే అల్లరి కూడా ఒక్కోసారి నవ్వు తెప్పిస్తుంది. ఈ మధ్యకాలంలో నగరాల్లో లాఫింగ్‌ క్లబ్‌ లు పెరిగిపోతున్నాయి. రోగనిరోధక శక్తి కూడా నవ్వడం వల్ల పెరుగుతుందని వైద్యులు చెప్తున్నారు.
