ఇవాంకాకు హలీం..బిర్యానీ

biryani-haleem-ivankaప్రఖ్యాత తాజ్‌ ఫలక్‌నుమాలో ప్రత్యేక విందు

హలీం.. బిర్యానీ.. షీక్‌ కబాబ్‌.. మటన్‌ మరగ్‌.. మొగలాయి చికెన్‌.. ఖుర్భానీ కా మీఠా.. డ్రైఫ్రూట్స్‌ ఖీర్‌ లాంటి 30 రకాల నోరూరించే రుచులను నగరానికి విచ్చేస్తున్న అగ్రరాజ్య అధినేత డొనాల్డ్‌ ట్రంప్‌ కుమార్తె ఇవాంకా ట్రంప్‌ కోసం సిద్ధం చేస్తున్నారు. ఇవాంకా మెచ్చే అమెరికన్‌ టేస్టీ రుచులతో పాటు 18 హైదరాబాదీ స్పెషల్‌ ఐటమ్స్‌ ను కూడా తయారు చేస్తున్నారు. నగరంలో ఈనెల 28 నుంచి జరగనున్న అంతర్జాతీయ వ్యాపారవేత్తల సదస్సు(జీఈఎస్‌)లో ఇవాంకా పాల్గొంటారు.

ఇవాంకాతోపాటు ప్రధానమంత్రి నరేంద్ర మోడీలకు హైదరాబాద్‌లోని ప్రఖ్యాత ఫలక్‌నుమా ప్యాలెస్‌లో రాష్ట్ర ప్రభుత్వం రాత్రి విందు(డిన్నర్‌)ను ఏర్పాటు చేసింది. తాజ్‌ ఫలక్‌నుమా ప్యాలెస్‌లోని  చారిత్రక 101 డిన్నర్‌ టేబుల్‌పై ప్రత్యేకమైన హైదరాబాదీ రుచులు వాహ్‌ అనిపించనున్నాయి. వంటకాల తయారీపై ఇప్పటికే దృష్టి పెట్టారు. ఇందుకోసం ఏరికోరి ముడిసరుకులు.. దినుసులు, మసాలాల సేకరణ చేపట్టారు. వంటకాల తయారీకి నలభీములనదగ్గ చెఫ్‌లను రంగంలోకి దించింది సర్కార్‌.

ఇవాంకా.. మజాకా..: తాజ్‌ ఫలక్‌నుమాలో విందు ఏర్పాట్ల కోసం ఇవాంకా వ్యక్తిగత ఫుడ్‌ అండ్‌ బేవరెజ్‌ సిబ్బంది, చెఫ్‌ అండ్‌ మెనూ కమిటీలోని 8 మంది సభ్యులతోపాటు.. ఫలక్‌నుమా  చెఫ్‌ల సమన్వయంతో హైదరాబాదీ, అమెరికన్‌ స్టాటర్స్‌ వంటకాలు తయారు చేస్తారు. అమెరికా సిబ్బంది ఐదు రోజుల ముందుగానే నగరానికి చేరుకోనుంది. వంటకాల్లో వినియోగించే దినుసులు నిల్వ చేసిన స్టోర్‌ను అమెరికా సిబ్బంది తమ అధీనంలోకి తీసుకోనున్నారు.

ఈ వంటకాలను ఒక రోజు ముందుగా సిబ్బంది ప్రయోగాత్మకంగా తయారుచేసి రుచి చూడనున్నారు. ఎందులో కారం తగ్గించాలి.. ఎందులో పులుపు.. ఉప్పు పెంచాలి.. స్టాటర్స్‌లో ఏ మోతాదులో నెయ్యి, మసాలా దినుసులు వాడాలో నిర్ణయిస్తారు. స్వీట్స్‌లో కూడా ఎంత మోతాదులో షుగర్‌ వేయాలి.. స్వీట్స్‌లో వెన్న, క్రీమ్‌ ఎంత వేయాలో కూడా వారు నిర్ణయిస్తారు. ఈ నెల 28న వంటకాలన్నీ సిద్ధంచేస్తారు. విందుకు గంట ముందు ఫుడ్‌ టెస్టింగ్‌ కమిటీ సిబ్బంది అన్ని వంటకాలనూ రుచి చూస్తారు. ప్రతి వంటకాన్ని కొంత మొత్తంలో ప్యాక్‌ చేస్తారు. ఫుడ్‌లో ఏదేని అలర్జీ కారకం ఉన్నా.. ఏదేని ఇన్‌ఫెక్షన్‌ కారక సూక్ష్మజీవులున్నట్లు భావిస్తే ప్రయోగశాలకు పంపించేందుకే ఫుడ్‌ను ప్యాక్‌ చేస్తారు.

హైదరాబాద్‌ సే అమెరికా తక్‌..

విందులో హైదరాబాదీ వంటకాలతో పాటు ఇవాంకాకు నచ్చే అమెరికన్‌ స్టాటర్స్‌ కూడా వేడివేడిగా వండి వడ్డించనున్నారు. ఫలక్‌నుమా ప్యాలెస్‌ చెఫ్‌తో పాటు అమెరికా నుంచి వచ్చే ఇవాంకా వ్యక్తిగత వంట సిబ్బంది పర్యవేక్షణలో 18 హైదరాబాదీ వంటకాలు తయారు చేస్తున్నారు. ఇవాంకా విషయంలోనూ ఆమె ఇష్టంగా తినే అమెరికన్‌ స్టాటర్స్‌ తయారీ కోసం అవసరమైన వస్తువులను ఫుడ్‌ అండ్‌ బేవరేజ్‌ సిబ్బంది అమెరికా నుంచే తీసుకొచ్చే అవకాశం ఉంది.

హైదరాబాదీ స్పెషల్స్‌ ఇవే..

హైదరాబాదీ స్టాటర్స్‌ అయిన హలీం, మరగ్, షీక్‌కబాబ్‌తో పాటు నాన్‌ రోటీ, రుమాలీ రోటీ, పరాటా వడ్డిస్తున్నారు. దీంతో పాటు మటన్‌ కోఫ్తా, గ్రిల్డ్, మొగలాయి మటన్, చికెన్‌ డిషెస్, బగారా బైగన్, చికెన్, మటన్‌లో మరో మూడు ఫ్లాటర్స్‌ ఐటమ్స్‌ వండి వడ్డించనున్నారు. స్వీట్స్‌లో హైదరాబాదీ స్పెషల్‌ ఖుర్భానీకా మీఠా, డైఫ్రూట్స్‌ ఖీర్‌ వడ్డిస్తారు.

 

 

 

Leave a Reply

Connect with us



© 2012 - 2016 VIL Media Pvt Ltd. All rights reserved,
Contents of v6news.tv are copyright protected.Copy and/or reproduction and/or re-use of contents or any part thereof,
without consent of VIL Media is illegal.Such persons will be prosecuted.  Terms & Conditions  |  Privacy policy