ఏది నిజం: విక్రమ్ కాల్పుల మిస్టరీ

vikramgoudకాంగ్రెస్ సీనియర్ నేత… మాజీ మంత్రి ముఖేష్ గౌడ్ కుమారుడు విక్రమ్ గౌడ్‌పై జరిగిన గన్ ఫైర్ ఇంకా మిస్టరీగానే ఉంది. ఘటన జరిగిన సుమారు 60 గంటలు పూర్తయినా ఇంకా పోలీసులకు ఎలాంటి ఆధారం దొరకలేదు. అయితే తుపాకీ కాల్చినప్పుడు బయటకు వచ్చే గన్ పౌడర్ మాత్రం విక్రమ్ చేతులతో పాటు ఆయన భార్య షిపాలీ చేతులపై పడినట్లు పోలీసుల దర్యాప్తులో తేలింది. కేసు విచారణలో విక్రమ్, షిపాలీ ఒకే మాటమీద నిలబడటంతో కేసు విచారణ ముందుకు సాగడంలేదని తెలుస్తోంది. అయితే వారు చెప్పిన సమాచారంతో పోలీసులు ఏకీభవించట్లేదు. కాల్పుల ఘటనను పోలీసులు ఆత్మహత్యాయత్నంగానే తేల్చినట్లు విశ్వసనీయ వర్గాల సమాచారం.

సంఘటనాస్థలంలో క్లూస్ టీం సేకరించిన ఆధారాల సాయంతో పోలీసులు ఈ నిర్ణయానికి వచ్చారట. విక్రమ్, షిపాలీ చెప్పినట్లు బయటి వ్యక్తులు వచ్చి కాల్పులు జరిపిన ఆనవాళ్లు పోలీసులకు లభించలేదట. అయితే ఆత్మహత్యకు ఉపయోగించిన పిస్తోల్ దొరకకపోవడంతో దాని గురించి పోలీసులు అన్వేషిస్తున్నారు. భార్యభర్తలే ఈ ఆయుధాన్ని మాయం చేసి ఉంటారని పోలీసులు అనుమానం వ్యక్తంచేస్తున్నారు. పిస్తోల్‌తో పాటు ఓ పని మనిషి కనిపించకపోవడం… సోఫాపై రక్తపు మరకలు తుడిచేయడం వల్ల దీనిలో షిపాలి పాత్ర ఉందని పోలీసలు అనుమానిస్తున్నారు.

విక్రమ్ దంపతులపై మీడియాలో వస్తున్న కథనాలపై ఆయన భార్య షిపాలీ స్పందించారు. శనివారం (జులై29) ఆమె మీడియాతో మాట్లాడారు. తమపై అసత్య ప్రచారం జరుగుతోందని ఆమె ఆరోపించారు. దుండగులు ఇంట్లోకి ప్రవేశించి కాల్పులు జరిపారని చెప్పారు. పోలీసులకు కూడా ఇదే విషయాన్ని తాము స్పష్టం చేశామని తెలిపారు. టాస్క్‌ఫోర్స్ డీసీపీ లింబారెడ్డికి వివరాలన్నీ చెప్పామన్నారు. పోలీసులపై తమకు పూర్తి నమ్మకం ఉందని… త్వరలోనే వారు ఈ కాల్పుల మిస్టరీని ఛేదించి తమకు పూర్తి న్యాయం చేస్తారని ఆమె తెలిపారు. ప్రస్తుతం విక్రమ్ ఆరోగ్యం నిలకడగా ఉందని చెప్పారు. అయితే విక్రమ్ గౌడ్ వెన్ను భాగంలో ఒక బుల్లెట్ అలానే ఉండిపోయిందని డాక్టర్లు తెలిపారు. దాన్ని ఆపరేషన్ చేసి బయటకు తీస్తేనే ప్రమాదమని… అలానే ఉంచేస్తే ఎలాంటి ఇబ్బంది  ఉండదని చెప్పారు.

Leave a Reply

Connect with us



© 2012 - 2016 VIL Media Pvt Ltd. All rights reserved,
Contents of v6news.tv are copyright protected.Copy and/or reproduction and/or re-use of contents or any part thereof,
without consent of VIL Media is illegal.Such persons will be prosecuted.  Terms & Conditions  |  Privacy policy