- జీవితమంటే తెలియని వయసులో పెండ్లి చేశారు
- అర్థం చేసుకోలేని భర్త దొరికాడు
- సూసైడ్ లెటర్‌ రాసి జీవితం చాలించిన మహిళ
చిన్నప్పటి నుంచే ఎన్నోకలలు.. ఐపీఎస్ ఆఫీసర్‌ అయినట్టు .. ఖాకీ డ్రెస్ వేసుకున్నట్టు ఊహించుకుని మురిసిపోయేది. కానీ 16 ఏండ్ల నుంచే ఆ ఆశలు ఒక్కొక్కటిగా కుప్పకూలడం మొదలయ్యాయి. చదువు గురించి ఆలోచించని తల్లిదండ్రులు భారం దించుకుందామని పెండ్లిచేసి పంపించేశారు. ఎంత మొత్తుకున్నా వినిపించుకోలేదు. పెండ్లయితేనేం ఎంతో మంది లక్ష్యాన్ని చేరారు కదా అని సర్ది చెప్పుకుని మెట్టినింట అడుగుపెట్టింది. కానీ ఎవరి సహకారం దొరకలేదు. ఇంతలోనే ఇద్దరు పిల్లలు. మహారాష్ట్రలో ఉద్యోగంచేసే భర్త. ఈ పరిస్థితుల్లోనూ కష్టపడి డిగ్రీ పూర్తిచేసింది. ఐపీఎస్ కాకపోయినా కనీసం ఎస్ ఐ అవుతాననుకుంది. నిర్మల్ జిల్లా ఖానాపూర్‌ నుంచి దిల్ సుఖ్‌ నగర్ కు పిల్లలతో కలిసి వచ్చింది. ఎస్సై కోచింగ్ తీసుకుంటోంది. ఏమైందో ఏమో తాను ఓడిపోయానని.. అందుకు కారకులు మీరేనంటూ పేరెంట్స్‌ ను, భర్తను ఉద్దేశిస్తూ ఓ లెటర్‌ రాసి శనివారం సూసైడ్ చేసుకుంది. ఆడ పిల్లలను కనే తల్లిదండ్రులు ముందు వారి పెండ్లిళ్ల గురించి కాకుండా చదువుల గురించి ఆలోచించాలని చెబుతూ జీవితాన్ని ముగించింది.
చైతన్యపురి పోలీస్ స్టేషన్ పరిధిలోని గాయత్రి పురం కాలనీలో ఈ విషాద సంఘటన జరిగింది. చైతన్యపురి సీఐ సుదర్శన్ కథనం ప్రకారం.. నిర్మల్ జిల్లా కడెం మండలంఖానాపూర్ కు చెందిన గీతాంజలి(26), శంకర్ కు 2008లో పెండ్లి జరిగింది. పదహారేళ్ల వయసులోనే ఆమెకు పెళ్లి చేశారు తల్లిదండ్రులు. హైదరాబాద్ చైతన్యపురి గాయత్రి నగర్ కు వచ్చి.. ఉపాధి చూసుకున్నారు గీతాంజలి, శంకర్. పెళ్లి.. పిల్లల బాధ్యతలు చూసుకుంటూనే డిగ్రీ పూర్తిచేసింది గీతాంజలి. వీరికి సాయి వర్షిత్, సాయి వైశ్విత్ అనే ఇద్దరు కుమారులు. శంకర్ మహారాష్ట్రలోని ఓ ప్రైవేట్ కాలేజీలో లెక్చరర్ గా పనిచేస్తున్నాడు. హైదరాబాద్ నుంచి మహారాష్ట్రకు భర్తకు ట్రాన్స్ ఫర్ అయినా… గీతాంజలి పిల్లలను చూసుకుంటూ దిల్ సుక్ నగర్ లో ఎస్సైపరీక్ష కోసం కోచింగ్ తీసుకుంటోంది.
ఆశయానికి అడ్డుగా బాధ్యతలు
పిల్లలు, ఇంటి బాధ్యతలతో చదువుపై పూర్తిగా దృష్టిపెట్టలేకపోయింది. ఆమె కోరుకున్నట్లు జీవితం కన్పించలేదు. పోలీస్ కావాలన్న ఆశ అడుగంటిపోయింది. బాధ్యతల వలయంలో కూరుకుపోతుంటే… కళ్లముందే ఆశయం ఆవిరవుతుంటే తట్టుకోలేకపోయింది. కుటుంబం నుంచి కోరుకున్న సపోర్ట్ లభించకపోవడంతో మదనపడింది. జీవితంపై విరక్తితో… శనివారం రాత్రి ఇంట్లోనే ఫ్యాన్ కు ఉరివేసుకుంది. కూతురుకు పెళ్లిచేసి బరువు దింపుకోవాలనుకున్న తల్లిదండ్రులను ఆలోచనలో పడేస్తూ.. తన మనోవేదనకు అక్షర రూపం ఇస్తూ సూసైడ్ నోట్ రాసింది. ‘అమ్మ నాన్నక్షమించండి. నేను చచ్చిపోతున్న. నాకు జీవితమంటేనే తెలియని వయసులో పెళ్లి చేశారు. సంసారం అనే ఊబిలోకి పంపారు. పిల్లలకు ఎలా పెళ్లి చేయాలి అని ఆలోచించారు తప్ప.. వారిని చదివించి గొప్పవారిగా చేయాలని మీరు అనుకోలేదు. బాగా చదివి ఐపీఎస్ అవుదామని అనుకున్న. పెండ్లి, పిల్లలతో చదువు నాశనమైంది. అర్థం చేసుకునే భర్త దొరకలేదు. నాకు బతకాలని లేదు. అందుకే చనిపోతున్న’ సూసైడ్ నోట్ లో రాసింది.
‘నాపిల్లలు జాగ్రత్త. బిట్టు, సాయి ఇక మిమ్మల్ని కొట్టనురా’ అంటూ ఆమె రాసిన వైనం స్థానికులను కంటతడి పెట్టించింది. గీతాంజలి భర్తకు సమాచారం అందించామని హైదారాబాద్ కు బయలుదేరాడని పోలీసులు తెలిపారు.
