ఏప్రిల్ 1 నుంచి ఆటోమొబైల్ కంపెనీలు BS-IV ఇంజిన్ క‌లిగిఉన్న వాహ‌నాల‌ను మాత్ర‌మే విక్ర‌యించాల‌ని సుప్రీంకోర్టు సంచలన తీర్పు వెల్ల‌డించింది. సుప్రీం తీర్పుతో ఒక్క‌సారిగా ఖంగుతిన్నాయి ఆటోమొబైల్ కంపెనీలు. ఇప్ప‌టికే BS-III ఇంజిన్‌తో 8.4 ల‌క్ష‌ల వాహ‌నాలు త‌యార‌య్యాయ‌ని అమ్మ‌కానికి రెడీగా ఉన్న‌ట్లు ఆటోమొబైల్ కంపెనీలు చెబుతున్నాయి. వీటి విలువ రూ.12వేల కోట్లుగా పేర్కొన్నాయి. ఆరు నుంచి 7 నెల‌ల స‌మ‌యం ఇవ్వాల‌ని ఆటోమొబైల్ కంపెనీలు కోర్టును కోరిన‌ప్ప‌టికీ ఫ‌లితం లేక‌పోయింది. జ‌న‌వ‌రి 2016 నుంచి BS-III ఇంజిన్ క‌లిగి ఉన్న వాహ‌నాల‌ను ఏమేర‌కు విడుద‌ల చేస్తున్నామ‌నే దానిపై సుప్రీం కోర్టుకు పూర్తి నివేదిక‌ను సమ‌ర్పించింది సొసైటీ ఆఫ్ ఇండియ‌న్ ఆటోమొబైల్ మానుఫాక్చుర‌ర్స్‌. మొత్తం BS-III ఇంజిన్‌తో వ‌చ్చిన వాహ‌నాల సంఖ్య 8.4 లక్షలు ఉండ‌గా ఇందులో 96వేలు క‌మ‌ర్షియ‌ల్ వెహిక‌ల్స్‌,6 ల‌క్ష‌ల వ‌ర‌కు టూవీల‌ర్స్‌,40వేల‌వ‌ర‌కు త్రీవీల‌ర్స్ ఉన్న‌ట్లు నివేదిక‌లో వెల్ల‌డించింది.
పాత ఉద్గార నిబంధ‌న‌ల‌కు లోబ‌డే త‌మ స్టాక్‌ను అమ్ముకునేలా అనుమ‌తి ఉండేద‌ని 2005 నుంచి 2010లో BS-II నుంచి BS-IIIకి మారిన‌ప్పుడు కూడా ఇదే ప‌ద్ధతిలో స్టాక్‌ను విక్ర‌యించామ‌ని ఉత్ప‌త్తిదారులు కోర్టుకు తెలిపారు.
