భారత్ కు అరుదైన కానుక అందించారు జర్మనీ ఛాన్స్ లర్ ఏంజెలా మెర్కెల్. పదో శతాబ్దం నాటి దుర్గామాత విగ్రహాన్ని ప్రధాని నరేంద్ర మోడీకి గిఫ్ట్ గా ఇచ్చారు. మెర్కెల్ చొరవతో… 25 సంవత్సరాల తర్వాత… చోరికి గురైన విగ్రహం భారత్ కు తిరిగి వచ్చింది. జమ్మూకాశ్మీర్ లోని పుల్వామా జిల్లాలో.. పదో శతాబ్దం నాటి దుర్గామాత విగ్రహాన్ని ఓ ఆలయం నుంచి 1990లో స్మగ్లర్లు ఎత్తుకెళ్లారు. మన దేశంలో… మహిషాసుర మర్దిని అవతారంలో ఉన్న అమ్మవారి పురాతన విగ్రహాల్లో ఇది ఒకటి. విగ్రహాల స్మగ్లింగ్ లో పేరుమోసిన స్మగ్లర్… సుభాష్ కపూర్ ముఠా ఈ విగ్రహాన్ని ఎత్తుకెళ్లారని గుర్తించారు. మూడేళ్ల క్రితం.. దీన్ని స్టట్ గార్డ్ లోని లిండెన్ మ్యూజియంలో గుర్తించారు. అప్పటి నుంచి విగ్రహాన్ని భారత్ కు తిరిగి రప్పించేందుకు కేంద్రం ప్రయత్నించింది.
భారత్ లో మూడు రోజుల పర్యటన సందర్భంగా… దుర్గామాత విగ్రహాన్ని ఇక్కడికి తీసుకువచ్చారు జర్మనీ చాన్స్ లర్ మెర్కెల్. విగ్రహాన్ని తిరిగి ఇచ్చినందుకు.. మెర్కెల్ కు కృతజ్ఞతలు చెప్పారు మోడీ. మహిషాసుర మర్దని అవతారం చెడుపై మంచి సాధించిన విజయానికి చిహ్నమన్నారు.
