పిల్లలను హద్దుల్లో పెట్టుకోండి : రాజకీయ నేతలకు కేజ్రీవాల్‌ హితవు

.. రాజకీయ నేతల కుమారులకు రెట్టింపు స్థాయి శిక్షలు వేయాలి

.. . మహిళలపై ఆంక్షలు విధించవద్దు

..మహిళలకు స్వేచ్ఛగా తిరిగేందుకు అవకాశం కల్పించాలి

రాజకీయ నాయకులు విచ్చలవిడిగా తిరిగే తమ కుమారులను హద్దుల్లో ఉంచుకోవాలని హితవు చెప్పారు ఢిల్లీ ముఖ్యమంత్రి అరవింద్‌ కేజ్రీవాల్‌. మహిళలపై జరుగుతున్న అన్యాయాలకు అడ్డుకట్ట వేయాన్నారు. మహిళలపై ఆంక్షలు విధించవద్దని, దానికి బదులు వారు స్వేచ్ఛగా తిరిగేందుకు అవకాశం కల్పించాలన్నారు కేజ్రీవాల్‌. స్వాతంత్య్ర దినోత్సవం సందర్భంగా మంగళవారం ఢిల్లీలోని ఛత్రసాల్‌ స్టేడియంలో జెండా ఆవిష్కరణ అనంతరం ప్రసంగించారు. రాజకీయ నేతల కుమారులు ఎవరైనా మహిళలపై అఘాయిత్యాలకు పాల్పడితే రెట్టింపు స్థాయి శిక్షలు వేసేలా చట్టం తీసుకరావాలని ఆయన అభిప్రాయపడ్డారు.

ఈ మధ్య ఓ నేత కుమారుడు మహిళపై అఘాయిత్యానికి పాల్పడ్డాడు. మరో నేత మహిళలు రాత్రి వేళల్లో బయటికి రావద్దు అని సలహా ఇచ్చారు. అలాంటి వారి చెంప పగలగొట్టాలని పిలుపు నిచ్చారు కేజ్రీవాల్‌. భారత్‌ తరువాత స్వాతంత్య్రం వచ్చిన దేశాలు విద్యా రంగంలో పెట్టుబడులతో అభివృద్ధి రంగంలో మనకంటే వేగంగా దూసుకుపోతున్నాయన్నారు. గడిచిన రెండేళ్లలో తమ ప్రభుత్వ పనితీరు భేషుగ్గా ఉందన్నారు. పేదరికం పోవాలంటే అందరికీ విద్య అందడం ఒక్కటే మార్గమని  వివరించారు కేజ్రీవాల్‌.