ఇండియ‌న్ ఉమెన్స్ టీమ్ కెప్టెన్ మిథాలీ రాజ్ ప్ర‌పంచ రికార్డు చేరువ‌లో ఉంది. మ‌హిళ‌ల వ‌న్డే క్రికెట్‌లో అత్య‌ధిక ప‌రుగులు సాధించిన ప్లేయ‌ర్‌గా నిల‌వ‌డానికి మిథాలీ ఇంకా 34 ప‌రుగుల దూరంలో ఉంది. ప్ర‌స్తుతం 5992 ర‌న్స్‌తో వ‌న్డేల్లో ఇంగ్లండ్ మాజీ కెప్టెన్ ఎడ్వ‌ర్డ్స్ పేరిట ఈ రికార్డు ఉంది. 5959 ప‌రుగుల‌తో రెండో స్థానంలో ఉన్న మిథాలీ.. వ‌ర‌ల్డ్‌క‌ప్‌లో ఆస్ట్రేలియాతో ఇవాళ జ‌ర‌గ‌బోయే మ్యాచ్‌లో ఈ రికార్డు అందుకోవాల‌ని చూస్తోంది. అదే జ‌రిగితే ఎడ్వ‌ర్డ్స్ కంటే త‌క్కువ మ్యాచుల్లో ఈ ఘ‌న‌త సాధించిన రికార్డు కూడా మిథాలీ సొంత‌మ‌వుతుంది. 16 ఏళ్ల వ‌య‌సులో 1999లో వ‌న్డేల్లో అరంగేట్రం చేసిన మిథాలీ.. ఐర్లాండ్‌తో తొలి మ్యాచ్‌లోనే సెంచరీ చేసింది. ఇప్ప‌టికీ అత్యంత పిన్న వ‌య‌సులో సెంచరీ చేసిన రికార్డు మిథాలీ పేరిటే ఉంది.
ఉమెన్ క్రికెట్ స‌చిన్ టెండూల్క‌ర్‌గా మిథాలీకి పేరుంది. దానిని నిల‌బెడుతూ.. ఇంట‌ర్నేష‌న‌ల్ క్రికెట్‌లోకి వ‌చ్చి 18 ఏళ్ల‌వుతున్నా ఇంకా రికార్డుల‌ను బ‌ద్ధ‌లు కొడుతూనే ఉంది. ఈ మ‌ధ్యే వ‌న్డేల్లో వ‌రుస‌గా ఏడు హాఫ్ సెంచ‌రీలు చేసిన తొలి క్రికెట‌ర్‌గానూ మిథాలీ నిలిచిన విష‌యం తెలిసిందే.
