ఫేస్ బుక్ తో పరిచయమైన స్నేహితులు ఓ పేద కుటుంబాన్ని ఆదుకున్నారు. నిలువ నీడలేని ఆ ఫ్యామిలీకి ఇల్లు కట్టించారు. లక్షా ఆరువేల రూపాయలతో ఇంటిని నిర్మించారు. ఆదివారం (ఆగస్టు27) వారు గృహ ప్రవేశం చేశారు. మంచిర్యాల జిల్లా బెల్లంపల్లి కన్నాలబస్తీకి చెందిన లక్కపట్ల పుష్పది నిరుపేద కుటుంబం. ఎలాంటి ఆస్తిపాస్తులు లేవు. పుష్పకు ఇద్దరు చెల్లెళ్లు. వారి వివాహ బాధ్యతలను స్వీకరించిన పుష్ప పెళ్లి చేసుకోలేదు. ఓ చెల్లెలికి పెళ్లి చేయడంతో ఆమె ఓ కూతురు రమ్యకు జన్మనిచ్చింది. ఆ తర్వాత చెల్లెలు భర్త అకాల మరణం చెందాడు. రమ్య పుట్టుకతోనే వికలాంగురాలు కావడంతో పుష్ప ఆమెను దత్తత తీసుకుంది.
వీరి దుస్థితిని గమనించిన బెల్లంపల్లి మైహార్ట్‌ బీట్‌ స్వచ్ఛంద సంస్థ నిర్వాహకులు సుదర్శన్, కల్పన జగిత్యాల జిల్లా ధర్మపురికి చెందిన సోషల్ వర్కర్ రేణికుంట రమేశ్‌ దృష్టికి తీసుకెళ్లాడు. దీంతో రమేశ్‌ ఈ నెల 1న పుష్ప దీనస్థితిని FBలో పోస్ట్‌ చేసి ఫ్రెండ్స్ సహకారం కోరాడు. దీంతో రూ.1.06 లక్షలు జమయ్యాయి. వీటితో పుష్పకు ఇల్లు నిర్మించారు.
