కేంద్రం ప్రభుత్వం మరో సంచలన నిర్ణయం తీసుకుంది. స్వాతంత్ర్యం వచ్చిన 70 ఏళ్లలో ఇప్పటి వరకు ఏ సందర్భంలోనూ ప్రత్యేకంగా పార్లమెంట్ అర్థరాత్రి సమావేశం కాలేదు. GST ( గూడ్స్ అండ్ సర్వీసెస్ ట్యాక్స్) వస్తు, సేవా పన్ను అమలు కోసం ఈ కీలక నిర్ణయం తీసుకుంది కేంద్రం. జూలై ఒకటో తేదీ నుంచి జీఎస్టీని అమల్లోకి తీసుకొచ్చేందుకు ఆవిష్కరణ కార్యక్రమం నిర్వహిస్తున్నారు. అందుకు పార్లమెంట్ సెంట్రల్ హాల్ వేదిక కానుంది. రాష్ట్రపతి ప్రణబ్ ముఖర్జీ ప్రారంభించనున్నారు. ప్రధాని మోడీతోపాటు అన్ని రాష్ట్రాల సీఎంలు, ఎంపీలు, ప్రతిపక్ష నేతలు అందరూ హాజరుకానున్నట్లు కేంద్ర ఆర్థిక మంత్రి అరుణ్ జైట్లీ ట్విట్టర్ ద్వారా ప్రకటించారు. కొత్తగా తీసుకురానున్న జీఎస్టీ పన్ను విధానం వల్ల దేశానికి మేలు జరుగుతుందన్నారు. పన్ను ఎగవేతలను కూడా అరికట్టవచ్చన్నారు. GST వల్ల ఎదురయ్యే ఇబ్బందులు, సవాళ్లను సమర్థవంతంగా ఎదుర్కొనేందుకు సిద్ధంగా ఉండాలని పిలుపునిచ్చారు జైట్లీ. జూన్ 30వ తేదీ రాత్రి 11 గంటలకు పార్లమెంట్ సెంట్రల్ హాలులో కార్యక్రమం ప్రారంభం అవుతుంది. సరిగ్గా 12 గంటలకు (జూలై 1) జీఎస్టీని రాష్ట్రపతి ఆవిష్కరిస్తారు. అప్పటి నుంచి ఒకే జాతి – ఒకే పన్ను – ఒకే మార్కెట్ విధానం దేశవ్యాప్తంగా వంద కోట్ల మందికి అమలు అవుతుంది.
Late on 30th of June, A programme will be organized in Central Hall of Parliament. Launch will take place exactly at the midnight: FM #GST pic.twitter.com/6WhSSkCAx6
— ANI (@ANI_news) June 20, 2017
