ఉద్యమం సమయంలో తెలంగాణ రాష్ట్రం ఏర్పాటు కావాలని దేవుళ్లకు మొక్కులు మొక్కానని.. ఇది ప్రజలందరి తరపున కోరిన కోర్కె అన్నారు. అనుకున్నట్లే రాష్ట్రం వచ్చిందని.. ఇప్పుడు మొక్కులు చెల్లిస్తుంటే విమర్శలు చేయటం ఏంటని విపక్షాలపై మండిపడ్డారు సీఎం కేసీఆర్. దేవుడికి చెల్లించే మొక్కులపైన ఇష్టం వచ్చినట్లు మాట్లాడుతున్నారని ఆగ్రహం వ్యక్తం చేశారు. దశాబ్దాలుగా అధికారంలో ఉన్న కాంగ్రెస్ పార్టీ ఏం చేసిందని నిలదీశారు. తెలంగాణ అభివృద్ధి నిరోధకులని.. ప్రాజెక్టులకు అడ్డుపతున్నారని విమర్శించారు. కాంగ్రెస్, ఇతర పక్షాల తీరును అసెంబ్లీ వేదికగానే ఎండగడతామన్నారు. రాష్ట్రం సుభిక్షంగా.. ప్రజలు చల్లగా ఉండాలని వీరభద్రస్వామిని కోరినట్లు చెప్పిన కేసీఆర్.. కురవి ఆలయ అభివృద్ధికి రూ.5 కోట్లు మంజూరు చేశారు.
ఎంబీసీ కార్పొరేషన్ ద్వారా 64 లక్షల మంది సంచార జాతులకు రూ.వెయ్యి కోట్లు కేటాయిస్తున్నట్లు ప్రకటించారు. నాయీ బ్రాహ్మణులకు 25 నుంచి 30వేల సెలూన్లు ఏర్పాటు చేస్తున్నట్లు ప్రకటించారు. యాదవులకు రూ.4వేల కోట్లతో 88వేల గొర్రెలు పంపిణీ చేస్తున్నట్లు వెల్లడించారు. డోర్నకల్, మరిపెడ అభివ్రుద్ధి కోసం కోటి చొప్పున.. డోర్నకల్ లోకి పంచాయతీలకు రూ.25లక్షల చొప్పున మంజూరు చేస్తామని హామీ ఇచ్చారు. ఉభయ గోదావరి జిల్లాలకు ధీటుగా వరంగల్ జిల్లాలో రెండు పంటలు పండే విధంగా అభివ్రుద్ధి చేసి చూపిస్తానన్నారు సీఎం కేసీఆర్.
