తమిళనాట రాజకీయాలు మరోసారి వేడెక్కాయి. తమిళనాడు గవర్నర్ విద్యాసాగర్ రావుతో టీటీవీ దినకరన్, శశికళ మద్దతుదారులు భేటీ అయ్యారు. మంగళవారం(ఆగస్టు-22) ఉదయం 19 మంది ఎమ్మెల్యేలు.. రాజ్ భవన్ లో గవర్నర్ తో సమావేశమై తాజా రాజకీయ అంశాలపై చర్చించారు. సీఎం పళనిస్వామికి తమ మద్దతు లేదని 19 మంది ఎమ్మెల్యేలు గవర్నర్ కు వినతిపత్రం అందజేశారు. కాసేపటికే ఎంపీ మైత్రేయన్ గవర్నర్ ను కలిసి పళనిస్వామికి సరిపోయినంత ఎమ్మెల్యేల మద్దతు ఉందని చెప్పారు.
తమిళనాడు అసెంబ్లీలో మొత్తం ఎమ్మెల్యేల సంఖ్య 234. అన్నాడీఎంకే ఎమ్మెల్యేలు 134 మంది. వీరిలో 19 మంది ఎమ్మెల్యేలు శశికళ వర్గానికి చెందిన వారున్నారు. ఈ 19 మంది ఎమ్మెల్యేలు పళనిస్వామికి మద్దతు ఉపసంహరించుకోవడంతో.. 115 మంది ఎమ్మెల్యేల మద్దతు మాత్రమే సీఎంకు ఉంటుంది. సీఎం పళనిస్వామి తన బలాన్ని నిరూపించుకోవాలంటే 117 మంది ఎమ్మెల్యేల మద్దతు కావాలి. మరో ఇద్దరు ఎమ్మెల్యేలు పళనికి మద్దతు ఇవ్వాలి. లేకపోతే పళని ప్రభుత్వం సంక్షోభంలో పడినట్లేనని రాజకీయ విశ్లేషకులు భావిస్తున్నారు.
